ANG TSINELAS NG TATAY
AT ANG LAMPIN NI INAY
Kakambal na siguro ng pagiging isang
magulang ang mga paghihirap ng anak. Kapag nahihirapan at nasasaktan ang
kanyang anak, doble ang nararamdaman ng isang magulang. Ang pagkakaroon ng nanay at tatay ay biyaya
mula sa Panginoon. Ang mag-karoon ng tulad nila ay isa sa mga dakilang regalo
ng Diyos. Ang ina nga raw yung nakabaon ang isang paa sa hukay habang
pinapanganak tayo. Nung unang binuhat
nila tayo sa kanilang bisig ay na-inlove agad sila sa atin. Sila yung may
kagalakan na nagpapalit ng diaper mo
kapag ito ay hindi na pwedeng gamitin. Pag-iyak mo pa lang, may nakahanda ng
gatas para sayo. Sila yung nagagalak na paglingkuran ka—pinapaliguan at
binibihisan. Sila yung lubos-lubos na nag-aalala kapag may sakit ka at hinihiling
na sana sila na lang ang makaranas ng lahat ng sakit na nararamdaman mo at
hindi na ikaw. Ang maging magulang ay isang ministeryo. Isa rin itong
napakahirap na trabaho sa mundo pero wala kahit pisong sweldo.
Ang magulang ay tao rin, nagkakamali.
Hindi sila perpekto kung paanong wala ni isa sa atin ang perpekto. Habang lumalaki
tayo, habang natututo, mas lalo nating nakikita na di sila perpekto. May
ngagagawang tama at may nagagawa ring mali. Ngunit sila pa rin ay magulang mo.
As we grow older at dumating ang araw
na magkaroon ka ng sariling pamilya, mas lalo nating makikita ang mga dakilang
bagay na ginawa sa atin ng ating mga
magulang. Sabi ng nanay ko, “Kapag
nagkaanak ka na, maiintindihan mo rin kami..”
Hinding-hindi ko makakalimutan ang
kwento ng isang ina na may iisang mata.
Mayroon siyang isang anak na ikinahihiya
siya. Siya ay nagtatrabaho sa canteen kung saan nag-aaral ang kanyang anak.
Minsan, bumisita siya sa silid-aralan ng kanyang anak para mag-hello. Napahiya
ang kanyang anak at hindi ito pinansin. At maya-maya pa ay tinitigan na sya ng
anak na galit na galit at saka tumakbo.
Kinabukasan, niloloko na ng mga
classmate si Louie dahil may ina itong iisa ang mata. Sa bahay, kinumpronta nya
ang kanyang ina at sinabing “Dahil sayo ay niloloko ako ng mga classmate ko...
SANA HINDI NA LANG IKAW ANG NANAY KO.”
Hindi sumagot ang ina..
Nag-aral ng mabuti si Louie at
pinalad na makapag-trabaho abroad. Hanggang sa lumipas ang mga taon ay ikinasal
sya at nagkaroon ng sariling pamilya. Masaya sya sa kanyang buhay kasama ang
asawa at anak. Masaya siyang malayo sa kanyang ikinahihiyang ina. Matagal
silang hindi nagkita.. buwan.. taon.. dekada..
Hanggang sa may kapit-bahay na
nagbalitang pumanaw na ang kanyang ina. Ni hindi umiyak si Louie. Ni gapatak na
luha at konting lungkot ay hindi mababanaag sa kanyang mukha. Ibinigay ng
kapit-bahay kay Louie ang liham ng ina na matagal na niyang gustong ibigay..
noon pa.
Ganito ang nakasulat:
Pinkamamahal kong Anak,
Lagi kitang inaalala.
Iniisip kita araw-araw. Patawarin mo ako kung nagdulot ako sayo ng kahihiyan
habang ika’y lumalaki. Masaya ako na matagumpay ka na sa buhay at may sarili
nang tinatawag na pamilya. Gustong-gusto kitang bisitahin, kaya lang hindi ako
makaalis sa aking higaan dala na siguro ng katandaan.
Anak patawarin mo ako..
Nang dahil sa akin, lumaki kang tinutukso at lagi na lang pinagtatawanan dahil
sa akin na iyong ina na may iisang mata.
Bilang isang ina, hindi
ko kayang makita na lumalaki ka na may iisang mata. Kaya ibinigay ko sayo ang
sa akin..
Masayang masaya ako para sayo na muli mong nakikita
ang mundo na buo para sa akin.. mula sa aking mata na ibinigay sayo dahil ika’y
aking mahal…
Kakambal na siguro ng mga magulang
ang magsakripisyo para sa anak. Kahit gaano katigas at kapasaway ang anak,
mahal na mahal pa rin ng magulang. Kahit anong mga hindi kanais-nais na bagay
ang ginagawa, bukas pa rin ang dalawang bisig upang sila’y muling tanggapin.
Hayaan mong magtanong
ako: Ikaw, paano mo tinatrato ang iyong magulang?
Maaaring kay yaman-yaman mo
pero mahirap ang magulang mo. Maaring nakatira sila malapit lang sayo pero
nakakalimot kang bumisita. Nasaan ang nanay mo, mag-isa sa Home for the Aged? O
baka nasa probinsya at nakalimutan mo ng i-text o tawagan? Ikaw ba ay kabataang
umaabuso sa magulang o isa na ring ganap na magulang na kinalimutan at
pinabayaan ang kanyang magulang?
Maaaring di ka sang-ayon
sa sinasabi nila o kung paano sila kumilos, pero kailangan pa rin nila ang
respeto mo. Tayo dapat ay nagsasalita ng may pag-galang sa ating magulang sa
tuwi-tuwina, especially sa mga public places at sa harapan ng mga anak mo. Kung
paano mo tinatrato ang magulang mo, ganun ka din itatrato ng mga anak mo.
Sasabihin ng iba, “Eh hindi naman kasi kagalang-galang ang tatay ko.” Kung ang
ina ang puso ng tahanan, ang ama ang ulo nito. Respect them patiently.
Magtiyaga tayo sa pag-galang sa kanila. Minsan kasi, nagiging impatient tayo.
Kailangan nila ng patience mo kung dumating ang panahon na hindi na niya marinig
at maintindihan ang sinasabi mo. Lahat tayo ay naranasang maging anak. At tayo
ay anak muna bago magulang. Kahit may anak ka na o magkaka-anak pa lang,
tandaan natin na ANAK MUNA TAYO BAGO MAGULANG.
Iba-ibang uri ng magulang
mayroon tayo. Mayroong nakaranas nang pang-aabuso mula sa magulang. Mayroon
ding naghirap sa kamay ng mga taong dapat sana ay magmamahal sa kanila.
Maraming magulang ang nagkakamali at nagkakasala pa rin. NGUNIT SILA PA RIN AY
MAGULANG NA DAPAT IGALANG AT IBIGIN. PATAWARIN MO SILA.
Nais ng mga magulang na
makita ang kanilang anak na namumuhay ng may kabuluhan. We could never repay
our parent but we ought to die trying.. Hindi sila gumagastos para sa sarili
nila hangga’t hindi nila natutugunan ang pangangailangan ng mga anak. Nariyan
ang mga magulang na handang libutin ang buong bayan para lang mangutang upang
maka-exam lang sa school ang kanyang mga anak. Mga magulang na nilulunok ang
pride upang humiram ng pera sa mga taong mapagmataas makatapos lang ang anak sa
pag-aaral. Mga magulang na handang magpaalipin sa ibang lahi matugunan lamang
ang pangangailangan ng anak. Mga magulang na handang isangla ang lahat makamit
lang ng mga anak ang tamis at pangako ng EDUKASYON. Hindi ko malilimutan ang
araw na iniabot sa akin ng aking tatay ang kanyang pambili ng tsinelas para
lang magkaroon ako ng pamasahe papuntang paaralan. Iyak ako ng iyak sa tuwing
makikita ko ang aking ama na nilalagyan ng tali ang kanyang tsinelas upang
hindi ito mabuwal. Kaya ipinangako ko sa sarili ko na kapag naging matagumpay
ako sa buhay, sila yung mga taong kahit kailan ay hinding-hindi ko
pagmamalakihan.
Parents need not to be
afraid of children who honor them. Kapag iginagalang, sinusunod at iniibig
natin ang ating magulang, at kapag iginagalang at iniibig din ng magulang ang
anak, alam mo ba ang tawag dun? Tinatawag itong “PAMILYA.”
Gaano man katagal ang
dapat nating bunuin sa pag-aalaga sa ating magulang, hindi pa rin nito
matutumbasan ang lahat ng kabayanihan na ginawa nila para ating buhay.
Kung dati, ikaw ang
pinapalitan niya ng lampin, maaaring dumating ang panahon na ikaw naman ang
gagawa nito para sa kanya. Kung paanong nagagalak sila na paglingkuran,
paliguan at bihisan ka noong bata ka pa, nawa, kapag sila naman ang
nangailangang paliguan, bihisan at paglingkuran ay mayroon ka pa ring kagalakan
sa iyong puso. Kapag dumating ang panahong nakukulitan ka na sa paulit-ulit
nilang kwento, nawa, matutunan mo sa iyong puso ang katiyagaan sa pakikinig
tulad ng kanilang ginawa noon habang pinapakinggan ang paulit-ulit at bulol na
kwento mo noong ika’y bata pa.
Looking in the days of my
life, natatawa ako. Nung mga bata pa tayo, nagpapataasan tayo ng edad. Subalit
habang nagkakaedad tayo, nababago na. Pinapababa natin, ang 42 ay nagiging 24
at ang 61 ay nagiging sweet 16. Naisip mo ba na ang bilis lang talaga ng
panahon? Hanggang sa dumating ako sa katotohanang KUNG TUMATANDA AKO, TUMATANDA
NGA RIN PALA ANG MAGULANG KO. Habang sila ay abot kamay pa natin, matutunan
nawa natin silang sundin, igalang, mahalin, at wag pagdamutan at
pagmamalakihan.
Walang komento:
Mag-post ng isang Komento